Kistalar
Yumurtalıq kistalarının bir hissəsi funksionaldır. Məsələn, partlamalı olan follikul partlamadıqda kistaya çevrilə bilər. Belə kistalar çox vaxt bir neçə menstrual sikl ərzində öz-özünə keçib gedir. Kistanın növü, ölçüsü və müşayiət edən şikayətlər qiymətləndirilmədən əməliyyat qərarı verilmir.
Miomalar
Miomanın hamiləliyə təsiri onun ölçüsündən və yerləşməsindən asılıdır. Uşaqlıq boşluğunu deformasiya edən miomalar embrionun yapışmasına təsir edə bilər. Uşaqlıq divarının xarici hissəsində yerləşən və şikayət yaratmayan miomalar isə çox vaxt hamiləliyə mane olmur. Miomanın dərhal çıxarılması hər zaman düzgün qərar deyil.
Hamiləlik planlaşdırırsınızsa
Uşaqlıq və yumurtalıqlar üzərində aparılan hər əməliyyatın öz riskləri var: yapışıqlıqlar və çapıq, yumurtalıq əməliyyatlarında isə yumurta ehtiyatının azalması. Buna görə hamiləlik planlaşdıran xanımlarda əməliyyat qərarı xüsusilə diqqətlə verilir. Yaxşı cərrahı fərqləndirən də budur: nə vaxt əməliyyat etmək lazım olduğunu bildiyi kimi, nə vaxt etməmək lazım olduğunu da bilmək.